سواء تعلق الأمر بقانون المالية أو قمع الإحتجاجات السلمية بوسائل همجية، تمشي حكومة بنكيران ومن يرعاها على طريق من سبقها. و على العموم أنك لا تجني من الشوك العنب

 

دابا كيف ديما في هده المدونة غادي نشوفو هاد ميزانية  حكومة سي بنكيران  واش جابت شي جديد .  مشروع قانون المالية قدر النفقات ديال الدولة ب 346 مليار ديال الدرهم . والمداخيل ب 314 مليار . أو معول على عجز مالي ديال 32 مليار.


في هاد التدوينة غادي نشوفو غير أرقام الميزانية العامة (255 مليار  مداخيل و 289 مليار مصاريف). 


نجوبو على جوج ديال الأسئلة :


1- نفرض أن مداخيل  الميزانية العامة هي 100 درهم فقط . من كتجيب الدولة هاد  100 درهم  ؟


كى تجيبها من عند الشعب والمقاولات او لكردي. كل 100 درهم كتجمع بهاد الطريقة:


21 درهم  كى تجي  من الضريبة على القيمة المضافة TVA ألي كولشي كيخلصها ( كتخلصها إيلا شريتي الحليب, إيلا بغيتي تدخّل الـ ADSL للدار, إيلا شريتي طونوبيل كات كات, إيلا شربتي غير قهيوة, طبعا  إذا كان مول القهوة اللي كتكلس فيها كيديكلاري المبيعات..)

16 درهم تأتي من الضريبة المفروضة على الشركات ( إيلا كنتي شركة, و كنتي كتربح بزاف ولا شوية, حسب الديكلاراسيون ديالك اللي درتي, كتخلّص . طبعاً إلى دورتي مع مول الضريبة دربتيها بي سلكة . هاد شي علاش هاد 16 درهم كتجي أساساً من عند الشركات العمومية )

11 درهم تأتي من الضريبة على الدّخل ( الرواتب, الإيجارات, الخدمات المهنية..)


بهاد تلاتة الحوايج جمعنا 48 درهم من 100 ألي خصنا. تقريباً بحال الميزانيات ألي سابقة . مكاينش شي جديد. او دابا ارا نجمعو زيد شوية بش نكملو 100  درهم ألي خصنا:


5 دراهم من الضريبة على منتجات الطاقة ( البلان في لبومبة...)

5 دراهم من رسوم التسجيل (الرسوم المفروضة على التحويلات إذا كنت في مجال العقار, و السيارات إيلا كانت عندك شي وحدة..)

4 دراهم من الرسوم الجمركية ( كتب, ملابس , دي في دي, من غير هادوك ديال غير درب غلف و باب الحد ومن غير سلعة الكونطر بوند طبعا)

- 3 دراهم من الضريبة المفروضة على التبغ ( إيلا كنتي كتكمي الغارو . أما الحشيش أو لكيف راه معفي طبعاً )

-1  درهم  من الخوصصة (الدولة بغى تبيع شي حاجة ب 3,2 مليارد درهم ولكن ملقيتش اش هاد لحاجة (

4  دراهم  من أرباح الدولة في الشركات ألي ديالها أولى مساهمة فيها (من غير  الضريبة على الشركات, 2 دراهم من OCP أو جوج دراهم لخرا من إتصالات ، CDG، بنك المغرب  ...)

   

مزيان, لكن الميزانية ديالنا باقا مكملاتش, باقي خصنا 26 درهم, حسنا, ستفعل الدولة كما يفعل الجميع في هذه الحالة : ستقوم باقتراضها من السوق, خصوصا القروض المحلية..


ودابا الناس اللي قراو التدوينات على الميزانيات السابقة غادي يغوتو علية:  اوا هاد شي عندك ما تبدل فيه والو !  هاد شي قولوه لبنكيران راه هو اللي دار الميزانية مشي أنا.  نزيدكم اش دار بنكيران ؟ شد  الميزانية العامة  ديال مزوار (هديك اللي سحبها من البرلمان) أو دار  على المداخيل ديالها جوج تعديلات:

       

- قرر أنه يتسلف 5 مليار جديدة  ( الميزانية العامة فقط)  زادها على لكريدي لاخر ليكان معول عليه مزوارلحقاش كيف غادي نشوفو زاد في المصاريف . 

- قال ل OCP غادي تعطيني 4 مليار عوض 3 ديال ميزانية مزوار 

- شي لاخر بقى تقريباً هو هو . زيد شوية هنا   نقص  لهيه 

         

فوالة هاد شي ليكين. سيد دار كوبي كولي، تسلف أو رقع هادا جهدوا.  حاجة وحدة لدارها مزيانة هي هداك "صندوق دعم التماسك الإجتماعي"  لفيه 2 مليار درهم مقتطعة أساسا من مساهمة الشركات ومؤسسات التامين. ما كي بانش لينا هنا لحقاش كين في حساب خصوصي للخزينة مشي في الميزانية العامة .


 أجي دابا نشوفو المصاريف واش تبدل فيهم. 




2- نفرض أن مصاريف الميزانية العامة هي 100 درهم فقط . كيفاش غادي تخسر الدولة  100 درهم  ؟


كيف العادة  بهاد 100 درهم الدولة تقوم بثلاثة أشياء :



- 65 درهم لدفع  نفقات التسيير (مقابل 63 درهم في 2011) 

 - 20  درهم  للاستثمار  (مقابل  22 درهم في 2011)

- 15 لتسديد الديون وفوائدها.  (مقابل 15 درهم في 2011)


أول ملاحضة هي أنه بالمقارنة مع 2011 حكومة بنكيران خدات واحد 2 دراهم من الإستتمار أو دارتها في التسيير . إلى سولتو أي طالب في سنة أولى إقتصاد غادي يقول لكم هاد شي هو اللي ما خصش يتدار. ما علينا ارا نشوف هاد شي بالتفصيل. فن كتمشي 100 درهم؟ 

    

 - 32 درهم لدفع رواتب  الموضفين  ( منها 14 درهم لرجال التربية و التعليم(

18 درهم لوزارة التربية الوطنية وزميلتها التعليم العالي  ( 14 درهم السابقة إضافة ل 2 دراهم للمعدات و النفقات المختلفة و درهم واحد   للاستثمار  )

16 درهم لصندوق المقاصة (هداك الصندوق ليكولشي كيهدر عليه - بنكيران زاد فيه واحد 15 مليار درهم أو وصل دابا ال-45 مليار . كيف كيقول واحد الفيلسوف : تمن السلم الإجتماعي)

- 15 درهم لتسديد الديون (8 دراهم ليراس المال و 7  درهم للفوائد وحدها)

10 درهم تذهب للجيش ( الرواتب , المعدّات..  )

-   7 دراهم لوزارة الداخلية(قوات الأمن وقوات القمع)

- 4 دراهم لوزارة الصحة 

 - 4 دراهم لي الفلاحة والصيد

- 3 دراهم لقطاع التجهيز والنقل 

2 دراهم  الطاقة والمعادن والماء  و-البيئة 

 - 1 درهم  للملك والقصر الملكي (على سبيل المتال ميزانيته تفوق ميزانية وزارة الخارجية وتشكل ضعف ميزانية الشبيبة والرياضة)

- باقي القطاعات تقتسم مابقى


 ونصل إلى نفس الخلاصة.اش دار بنكيران ؟ خدة  الميزانية العامة  ديال مزوار (هديك اللي سحبها من البرلمان) أو دار  على المصاريف ديالها تعديل أساسي واحد:  زاد في  صندوق المقاصة واحد 15 مليار ، - شي لاخر بقى تقريباً هو هو . زيد شوية هنا  نقص لهيه .  هادا جهدوا.  


أو هاد شي راه كان متوقع . علاش؟  لحقاش في المغرب كين مقدسات وطنية ودينية وكين أيضاً المقدسات الإقتصادية ليكولشي خاص يلتزم بها. أو هادشي راه الملك ليقالوا براسو: 

وبقدر ما نحن مؤتمنون على مقدساتنا الدينية والوطنية، فإننا حريصون على التزام الجميع بثوابت اقتصادية واجتماعية، تعد من صميم الحكامة التنموية الجيدة، التي يتعين التشبث بها، في جميع الأحوال، ولاسيما في مواجهة الظرفيات الدقيقة.


  3- دابا نشوفو هدوك 26 ألف واحد ليغادي يخدمهم بنكيران فن غادي يمشيو.

الأغلبية ديالهم كانوا معطلين  كيتظاهرو  في الشارع  أو كيجري عليهم البوليس . أو الأغلبية ديالهم غادي يخدموا في ... وزارة الداخلية والعسكر والحبس . نكتة او صافي. 

  

نخدو 100 واحد غادي تخدمهم الدولة في إطار ميزانية 2012:

- 34 واحد غادي يمشيو لوزارة الداخلية .

- 13 واحد لوزارات الدفاع

- 3 غادي يمشيو للحبس (زعما غادي يخدمو فيه مشي يتشدو)

  

يعني نص ديال  الناس ليغادي تخدمهم الدولة غدو يمشيو للأجهزة  الأمنية .    اوا هاد شي علاش دوزنا  مسيرات أو مسيرات كى نغوتو  "باركا من البوليس زيدونا فلمدارس".


- 29 غادي يمشيو  التربية والتعليم 

- 8 لوزارة الصحة 

- 4 عند سي الرميد لي من نهار ولا وزير قلب لفيستا

 

من بين 26 ألف  واحد , 200 شخص في غادي يخدموا؟ في القصر الملكي .  ياكما الطلياني او صحابو ديال الشباب الملكي ؟